Ozarbayjonda akkreditatsiyadan o‘tgan diplomatik korpus vakillari Kalbajar shahrida bo‘lib o‘tgan Asal festivalida ishtirok etdilar.
Modern.az xabar berishicha, diplomatlar asalarichilik fermerlari tomonidan taqdim etilgan turli xil asal va asalarichilik mahsulotlarini ko‘zdan kechirdilar, ishlab chiqarish jarayoni va sifat ko‘rsatkichlari haqida ma’lumot oldilar. Ular asalarichilar bilan mavsumiy hosildorlik va sotish imkoniyatlari haqida fikr almashdilar.
Ta’kidlash joizki, festival Haydar Aliyev fondi vitse-prezidenti, IDEA jamoat birlashmasi asoschisi va rahbari Leyla Aliyevaning tashabbusi bilan IDEA jamoat birlashmasi, Ozarbayjon Respublikasi Prezidentining Kalbajar tumanidagi maxsus vakolatxonasi, Qishloq xo‘jaligi vazirligi, “Agrar ta’minot va yetkazib berish” OAJ va Ozarbayjon Asalarichilar uyushmasi hamkorligida tashkil etildi.
Tadbirda Ozarbayjon Respublikasi Prezidentining yordamchisi – Prezident Administratsiyasi Tashqi siyosat masalalari bo‘limi mudiri Hikmat Hojiyev, Ozarbayjon Prezidentining maxsus topshiriqlar bo‘yicha vakili Elchin Amirbayov, Ozarbayjon Respublikasi Prezidentining Kalbajar tumanidagi maxsus vakili Bashir Hojiyev, qishloq xo‘jaligi vaziri Majnun Mammadov, davlat idoralarining mas’ul shaxslari, mahalliy aholi ishtirok etdilar.
