Azərbaycan Kooperasiya Universitetində “Var olsun Müzəffər Ali Baş Komandan!” adlı tədbir keçirilib.
Modern.az xəbər verir ki, Azərbaycan Kooperasiya Universitetində Kooperasiya Universitetinin, Nərimanov Rayon İcra Hakimiyyətinin, Rayon Gənclər və İdman İdarəsinin birgə təşkilatçılığı ilə Hadrut qəsəbəsinin işğaldan azad olunmasının ildönümü münasibəti ilə “Var olsun Müzəffər Ali Baş Komandan!” adlı tədbir keçirilib.
Tədbirdə Vətən Müharibəsi şəhidi, “Vətən uğrunda”, “Füzulinin azad olunmasına görə” və “Xocavəndin azad olunmasına görə” ölümündən sonra medalları ilə təltif olunmuş MAXE Ziyad Muradovun atası Muradxan Muradov, 2016-cı ilin Aprel döyüşlərinin şəhidi Mahir Mirzəyevin atası Sabir Mirzəyev, Nərimanov Rayon Gənclər və İdman İdarəsinin rəisi Nəcəf Novruzov, Azərbaycan Kooperasiya Universitetinin Tədris işləri üzrə prorektoru Fikrət Quliyev, Universitetin Mətbuat və ictimai işlər xidmətinin rəhbəri Tamerlan Əkbərov, Nərimanov Rayon İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiri Elçin Quliyev, Vətən Müharibəsinin qazisi Rauf Abdullayev, Qarabağ Müharibəsinin şəhidi Elçin Kərimbəylinin qardaşı Samir Kərimbəyli və fəal tələbələr iştirak ediblər.
Tədbirdə çıxış edən natiqlər qeyd etdilər ki, ötən il sentyabrın 27-dən başlayaraq Azərbaycan Ordusunun həyata keçirdiyi əks-hücum əməliyyatları nəticəsində Hadrut qəsəbəsi oktyabrın 9-da düşmən tapdağından azad edilib. Qəsəbənin azad olunması haqda ilk xəbəri Azərbaycan Respublikasının Prezidenti, Müzəffər Ali Baş Komandan İlham Əliyev xalqa çatdırıb.
