Dünəndən etibarən gündəmi zəbt edən “mexaniki səhv edən” həkimlə bağlı müzakirələr davam etməkdədir. Bu "rezonanslı əməliyyat" Səhiyyə Nazirliyi Angioloji və Mikrocərrahiyə Mərkəzində aparılıb. Mərkəzin həkimi Valeh Kərimov sol ayağının kəsilməsi barədə diaqnoz qoyduğu xəstənin sağ ayağını kəsib. Həkim açıqlamasında özü də səhv etdiyini boynuna alıb və “mexaniki olaraq səhvə yol verdim” deyib.

Milli Məclisin Səhiyyə komitəsinin sədr müavini Musa Quliyev Modern.az saytına açıqlamasında baş verən hadisəni səhiyyəmiz adına biyabırçılıq adlandırıb:

“Bu savadsızcasına həkim səhlənkarlığıdır. Burada təkcə o həkim deyil, əməliyyatda iştirak edən komandanın üzvləri –tibb bacıları, anestezioloq, eləcə də baş həkim məsuliyyət daşıyır. Amma kimin məsuliyyəti nə dərəcədədir, bu hüquq-mühafizə orqanlarının araşdırmalarından sonra bəlli olacaq.

Bu doğurdan da çox biyabırçı məsələdir ki, xəstənin lazım olan ayağı deyil, digər ayağı amputasiya olunsun. Mən həkimin açıqlamasını da oxudum. O, bildirir ki, “onsuz da, o biri ayağı da kəsiləməli idi”. Mən bu bəraəti qəbul etmirəm.

Söhbət ağacın budanmasından, hansısa budağının səhv kəsilməsindən, hansısa avadanlığın dəyişik salınmasından getmir, söhbət insan həyatından gedir. Bu səhvə görə isə təkcə həkim yox bütün komanda məsuliyyət daşıyır. Bunun bir adı var : biyabırçılıq”.

M.Quliyev həkimin Səhiyyə Nazirliyi tərəfindən ciddi cəzalandırılmasını istəyib:

“Hesab edirəm ki, Səhiyyə Nazirliyi məsələ ilə bağlı ciddi tədbirlər görməlidir. Mən həmişə parlamentdə həkimlərimizi müdafiə edən, səhiyyəmizin son illərdəki uğurlarından ürəkdolusu danışan insanam. Amma bu elə böyük, elə ciddi səhvdir ki, nə bağışlamaq, nə müdafiə etmək, nə də bəraət qazandırmaq mümkün deyil.

Bu mənada inanmaq istəyirəm ki, həm hüquq mühafizə orqanları, həm də Səhiyyə Nazirliyi tam ciddiliyi ilə məsələyə dair tədbirlərini görəcəklər”.

Gülşən RAUFQIZI