Mərkəzi Seçki Komissiyasının (MSK) bu gün keçirilən iclasında 68 saylı Cəlilabad kənd seçki dairəsindən Müsavat Partiyasının qeydə alınmış namizədi Davud Qurbanovun müraicətinə baxılıb.
Modern.az xəbər verir ki, müraciət haqqında MSK üzvü Validə Kazımova məlumat verib. O qeyd edib ki, araşdırma zamanı namizədin iddia etdiyi qanun pozuntuları öz əksini tapmayıb.
Sosial şəbəkələrdə yayılan görüntülərin də araşdırıldığını qeyd edən V. Kazımova hər hansı qanun pozuntularının qeydə alınmadığını söyləyib. MSK üzvünün təklifi, Komissiyanın ekspert qrupunun rəyi ilə qeydə alınmış namizədin şikayəti təmin edilməyib.
Bununla belə, MSK sədri Məzahir Pənahov qeydə alınmış deputatlığa namizəd Davud Qurbanovun şikayətinə cavab olaraq bildirib ki, 68 saylı Cəlilabad kənd seçki dairəsinin 9 və 25 saylı məntəqələrinin seçki komissiyaları ilə bağlı ölçü götürüləcək.
MSK sədrinin sözlərinə görə, həmin məntəqələrin komissiyaları hər ikisi nəzarətə götürülüb:
“Onlar barədə ciddi ölçü götürüləcək. Hər pozuntunun özünün adekvat cavabı olacaq. Həmin məntəqələr barədə daxil olan müraciətlər ciddi şəkildə araşdırılır”.
Qeyd edək ki, həmin dairədən lider namizəd Elman Nəsirovdur.
