Modern.az yazıçı Tural Turanın 1 cümləlik hekayələrini təqdim edir:
***
O, rəfiqəsinin, mən də dostumun bəxt üzüyünü iki-üç saatlıq borc alıb nişanlandıq.
***
Böyüyəndə anladıq ki, sən demə, uşaq olanda qorxumuzdan kəndimizdəki bütün şikəst qızlara bacı gözü ilə baxırmışıq...
***
Mən dünyamı dəyişəndən sonra da insan öldürmək həvəsinə düşsəniz, gəlib baş daşımı güllələyərsiniz.
***
İnanmırsınızsa gedib yoxlayın, bütün dilənçilərin nəbzi ovuclarında vurur.
***
İlk qonorarımla atama alışqan, anama ətir, bacıma corab, yazıçı olmaq istəyən qardaşıma saat və qələm alıb qəbristana – ailə məzarlığımıza üz tutdum...
***
Şair Temir Alpını– tanrını yox, onu yaradanları yox eləmək lazımdı – açıqlamasından sonra evinin qarşısında, yenicə yeriməyə başlayan qızının gözləri önündəcə ağzından güllələmişdilər.
***
Sürünü bazara çıxartma, qoyunları satsan torpaqlarımızı itirəcəyik – deyən atam məni fikrimdən daşındırmaq üçün önümdə diz çöküb ağlamağa başladı.
***
İyirmicə qəpiyə yeddi yaşlı qızın göz yaşları satılır...
Tural Turan