Milli Məclisin mətbuat xidmətindən Modern.az-a daxil olan məlumata əsasən, deputat Jalə Əliyeva fevralın 22-dən 27-dək Türkiyədə səfərdə olacaq. Deputat əvvəlcə Yalova şəhər bələdiyyəsinin və Azərbaycanın Türkiyədəki səfirliyinin təşkilatçılığı ilə Xocalı faciəsinə həsr olunmuş “Qarabağın işğalı və Xocalı soyqırımı” adlı Beynəlxalq konfransda, sonra isə İstanbulda Qara Dəniz İqtisadi Əməkdaşlıq Təşkilatı Parlament Məclisinin yaranmasının 20 illiyinə həsr edilmiş toplantıda iştirak edəcək.
Milli Məclisin deputatları Aydın Mirzəzadə və Elman Məmmədov Xocalı faciəsinə həsr edilmiş tədbirlərdə iştirak etmək üçün fevralın 22-dən 27-dək Türkiyəyə səfər edəcəklər. Qardaş ölkənin Giresun Universitetində və Yalovada Əskişəhər Osmanqazi Universitetində “Qarabağın işğalı və Xocalı soyqırımı” mövzusunda beynəlxalq konfranslarda iştirak edəcək deputatlarımız tədbir iştirakçılarına faciə haqqında ətraflı məlumat verəcəklər.
Aydın Mirzəzadə daha sonra Ankara və Trabzon şəhərlərində də olacaq., burada Xocalı faciəsinin 21-ci ildönümünə həsr edilmiş tədbirlərə qatılacaq.
Milli Məclisin deputatı Musa Qasımlı Türk Hava Qurumu Universitetinin və Universitet Məzunları İctimai Birliyinin təşkilatçılığı ilə Xocalı soyqırımına həsr edilmiş toplantılarda iştirak etmək üçün fevralın 23-dən 28-dək Ankarada səfərdə olacaq.
Deputat Azərbaycan tarixinin bu qanlı səhifəsi, faciənin miqyası və Ermənistan – Azərbaycan Dağlıq Qarabağ münaqişəsinin mövcud durumu barədə tədbir iştirakçıları ilə fikirlərini bölüşəcək.
Xocalı soyqırımının 21-ci ildönümü ilə əlaqədar Avropanın bir sıra ölkələrində anma mərasimləri, müxtəlif tədbirlər və aksiyalar keçirilir. Milli Məclisin deputatları Qənirə Paşayeva və Rövşən Rzayev Almaniyadakı tədbirlərə qatılmaq üçün fevralın 21-də Berlin şəhərinə səfərə yola düşəcəklər.
Bu ölkədə Alman-Azərbaycan Forumu tərəfindən Bundestaqın nəzdində fəaliyyət göstərən Almaniya Parlament Cəmiyyətində Xocalı faciəsinin 21-ci ildönümünə həsr olunmuş “Cənubi Qafqazda təhlükəsizlik və sabitlik, Almaniya-Azərbaycan münasibətlərinin perspektivləri” mövzusunda simpozium keçiriləcək. Almaniyadakı Azərbaycanlıların Koordinasiya Mərkəzi ilə Türk-Azərbaycan Birliyi isə Berlin, Frankfurt, Köln, Hamburq və Hannover şəhərlərində anma mərasimləri təşkil edəcək. “Azərbaycan Evi” Cəmiyyəti ilə Alman-Azərbaycan Həmrəylik Cəmiyyəti Berlində etiraz nümayişi, Bielefelddə yürüş-nümayiş, Drezdendə və Maqdeburqda təbliğat kampaniyaları keçirməyi planlaşdırıb. Almaniyada təhsil alan tələbə soydaşlarımız isə ölkənin siyasi, elm və mədəniyyət dairələrinə Xocalı soyqırımı barədə məlumatların göndərilməsini təmin edəcək.
Tədbirlərdə deputatlar yaxından iştirak edəcək, alman ictimaiyyətinə Xocalı soyqırımı barədə ətraflı məlumat verəcək, Azərbaycan həqiqətlərinə dair sənədlər yayacaqlar. 2011-ci ildə Almaniyada ilk dəfə işıq üzü görmüş “Xocalı” kitabının müəllifi Rolf Kunş ilə görüşüb fikir mübadiləsi aparacaqlar.
Hüquq siyasəti və dövlət quruculuğu komitəsinin sədr müavini Rövşən Rzayev daha sonra Avstriyaya yola düşəcək. Deputatımız fevralın 27-dən martın 2-dək Vyana şəhərində səfərdə olacaq. Xocalı soyqırımının 21-ci ildönümü münasibətilə Azərbaycanın Avstriyadakı səfirliyinin təşkil etdiyi konfransa qatılacaq.
Modern.az
