Bakı Ali Neft Məktəbinin (BANM) rektoru Elmar Qasımov cari tədris ilində yüksək nəticə göstərərək Ali Məktəbə qəbul olan Prezident təqaüdçüləri ilə onlayn görüş keçirib.
Modern.az xəbər verir ki, Elmar Qasımov tələbələri təbrik edərək bildirib ki, Prezident İlham Əliyevin “2020/2021-ci tədris ilində Azərbaycan Respublikasının ali məktəblərinə daxil olmuş tələbələrə Prezident təqaüdünün verilməsi” haqqında 29 oktyabr 2020-ci il tarixli Sərəncamına əsasən, Bakı Ali Neft Məktəbinin 22 tələbəsi Prezident təqaüdünə layiq görülüb.
O bildirib ki, bu ali təqaüd tələbələrin istər təhsil həyatında, istərsə də gələcək karyeralarında həlledici rol oynayacaq:
“22 Prezident təqaüdçüsündən 11 nəfər BANM-in “İnformasiya təhlükəsizliyi” ixtisasını, 10 nəfər “Proseslərin avtomatlaşdırılması mühəndisliyi” ixtisasını, 1 nəfər “Kimya mühəndisliyi” ixtisasını seçib. BANM Prezident təqaüdçülərinin sayına görə Respublika ali məktəbləri içərisində II yerdə qərarlaşıb, I ixtisas qrupu üzrə isə liderdir”.
Ali Məktəbin Prezident təqaüdçülərinin ümumi sayının 172 nəfərə çatdığını bildirən rektor bu tədris ilində BANM-in Prezident təqaüdçülərinin ən minimal balının 683.9 bal olduğunu vurğulayıb.
Tələbələrə həm təhsildə, həm həyatda, həm də gələcək karyeralarında yeni uğurlar arzulayan E.Qasımov Azərbaycanın intellektual gənclərinin məhz BANM-i seçməsini qürurverici hal kimi dəyərləndirib.
Rektor həmçinin tələbələrə bilik və sosial bacarıqlarını daim artırmalarını tövsiyə edib. Daha sonra tələbələrlə dərslərin gedişatı, imtahanlara hazırlıqla bağlı fikir mübadiləsi aparılıb.
