İşğaldan azad olunmuş ərazilərimizdə yenidənqurma işləri aparılır.  Dövlət qurumları bir müddət  sonra öz fəaliyyətinə başlayacaq. Düşmən tapdağından xilas edilmiş rayonlarda özünüidarəetmə orqanlarının nə zaman yaradılacağı isə sual altındadır.

Mövzu ilə əlaqədar Modern.az- a danışan Milli Məclisin Regional məsələlər komitəsinin üzvü Kamran Bayramov  bildirib ki, bu qurumların formalaşması üçün Dağlıq Qarabağ bölgəsində müəyyən sahələrdə tədbirlər görülməlidir:

“Hələ ki azad edilmiş ərazilərdə mülki idarəetməni həyata keçirən organların əsası qoyulub. Onlar  Dağlıq Qarabağ bölgəsinin dirçəlişi istiqamətində fəaliyyət göstərir. Lakin yerli özünüidarəetmə orqanlarının yaradılması üçün müəyyən işlərin görülməsinə ehtiyac var. Öncəliklə, mina təmizləmə prosesi tam başa çatmalıdır. Dəyən zərər hesablanmalıdır. İnfstrakturun salınması, habelə yaşayış evlərinin tikintisi və ərazidə bərpa işləri tamamlanmalıdır. Bundan sonra inzibati ərazi bölgüsü aparılması mühüm məsələdir. Torpaq islahatı keçirilməlidir. Didərgin düşmüş insanlar yurdlarına geri qayıtmalıdır. Yalnız bütün bu işlərin həllindən sonra özünüidarəetmə orqanlarının yaranmasından söhbət gedə bilər”.

Fidan ƏLİ