Əmək və Əhalinin Sosial Müdafiəsi Nazirliyinin mətbuat xidmətinin rəhbəri Elnur Camalxanovun Modern.az saytına verdiyi məlumata görə ünvanlı sosial yardımın verilməsi üçün tələb olunan sənədlərin azaldılması ilə bağlı yeni təkliflər hazırlanır. Mətbuat xidmətinin rəsmisi bildirib ki, nazirlik tərəfindən bu istiqamətdə davamlı araşdırmalar aparılır.
“ 2012-ci ildə aparılan araşdırmalarımızın nəticələrinə görə nazirliyin bir sıra işçiləri cəzalandırılıb, bəzilərinin isə vəzifələri aşağı salınıb. Ancaq bəzən elə olur ki, narazılıqlar yardım almaq istəyən vətəndaşların qaydaları bilməməsi səbəbindən yaranır. 10 gün bundan qabaq Gəncədə Elnur Kələntərlinin iştirakı ilə keçirilən araşdırma zamanı bu cür vəziyyətin şahidi olduq. Araşdırmamızın nəticəsi belə oldu ki, vətəndaşların ünvanlı yardımın alınması üçün lazım olan qaydalar haqqında məlumatları yoxdur”.
Şahanə RƏHİMLİ