Avqustun 30-da Azərbaycan Respublikasının Prezidenti İlham Əliyev Sinqapurda keçirilən yeniyetmələrin I Yay Olimpiya Oyunlarında iştirak etmiş idmançıları və mütəxəssisləri qəbul edib.
Dövlət başçısı Sinqapurda qazanılmış böyük və inamlı qələbə münasibətilə idmançıları, məşqçiləri və mütəxəssisləri təbrik edib. Prezident İlham Əliyev bu uğuru tarixi nailiyyət kimi dəyərləndirib və Azərbaycanın dünyanın aparıcı idman ölkələri sırasında olduğunu vurğulayıb.
İlham Əliyev Olimpiya Oyunlarında Azərbaycanın himninin 5 dəfə səsləndirilməsini və bayrağının 8 dəfə dalğalanmasını iftixar hissi doğuran hadisə kimi dəyərləndirib və idmançılarımızın şərəfli tarix yazdıqlarını deyib. İdmançılarımızın qarşıdakı London Olimpiya Oyunlarında da ölkəmizi ləyaqətlə təmsil edəcəklərinə əminliyini vurğulayan dövlətimizin başçısı yeniyetmə idmançılara daim peşəkarlıqlarını artırmağı tövsiyə edib.
Prezident Sinqapurda qazanılan qələbədə əməyi olan bütün şəxslərin mükafatlandırılacaqlarını bildirib.
Prezident İlham Əliyev Sinqapur Olimpiya Oyunlarının qalibləri və mükafatçıları sırasında respublikamızın bölglərindən idmançıların da təmsil olunmalarını xüsusi vurğulayıb. 2000-ci ildən bəri ölkəmizdə 30-dək olimpiya kompleksinin tikildiyini və daha 10 belə qurğunun inşa edildiyini bildirən dövlətimizin başçısı regionlarda idmanın inkişafına hərtərəfli diqqət göstərilməsi sayəsində bölgələrdə də perspektivli idmançıların yetişdiyini deyib.
Prezident İlham Əliyev Sinqapur Olimpiya Oyunlarında idmanın müxtəlif növlərində uğur qazanılmasının vacibliyini qeyd etmiş və hər bir sahədə olduğu kimi, idmanda da çoxşaxəli inkişafın diqqət mərkəzində saxlanıldığını bildirib.
Sonda xatirə şəkli çəkdirib.
