Azərbaycan və Rusiya xalqlarımızın maraqlarına xidmət etmiş və etməkdə davam edən zəngin mehriban qonşuluq, dostluq və əməkdaşlıq ənənələrinə malikdir. İkitərəfli münasibətlərdə yüksək səviyyəli müntəzəm təmaslar və dövlət strukturlarının fəal qarşılıqlı fəaliyyəti mühüm rol oynayır.
Modern.az xəbər verir ki, bunu Milli Məclis sədrinin birinci müavini, Azərbaycan tərəfdən həmsədr Əli Əhmədov Azərbaycan Milli Məclisi və Rusiya Federal Məclisinin əməkdaşlıq üzrə Parlamentlərarası komissiyasının 24-cü iclasında deyib.
Ə.Əhmədov vurğulayıb ki, Azərbaycan Milli Məclisi ilə Rusiya Federal Məclisi arasında əməkdaşlıq üzrə parlamentlərarası komissiya Azərbaycan-Rusiya qarşılıqlı anlaşmasında xüsusi yer tutur. Fəaliyyət göstərdiyi illər ərzində komissiya özünü parlamentlərarası əlaqələrin davamlı saxlanılmasına töhfə verən mühüm platforma kimi təsdiq edib.
Sədrin birinci müavini bildirib ki, 24-cü iclasın gündəliyi parlamentlərarası əməkdaşlığın bir sıra mühüm sahələrini əhatə edir:
“Azərbaycan Milli Məclisi ilə Rusiya Federal Məclisi arasında əməkdaşlıq kontekstində parlament demokratiyasının inkişafı məsələsinin müzakirəsi xüsusi əhəmiyyət daşıyır. Gözləyirik ki, parlamentlərarası əlaqələrin möhkəmləndirilməsi və təcrübə mübadiləsi parlament fəaliyyətinin səmərəliliyinin artırılmasına və ölkələrimiz arasında qarşılıqlı fəaliyyətin daha da inkişafına töhfə verəcək”.
O əlavə edib ki, iclasın diqqət mərkəzində səhiyyə və tibb kadrlarının hazırlanması sahəsində əməkdaşlıq, elm və təhsil sahəsində qarşılıqlı fəaliyyət məsələləri dayanır. Bu istiqamətlər xüsusi əhəmiyyət kəsb edir, çünki onlar birbaşa insan kapitalının inkişafı, cəmiyyətin rifahı və dövlətlərimiz arasında humanitar əlaqələrin möhkəmləndirilməsi ilə bağlıdır.
“Azərbaycan ilə Rusiya arasında əməkdaşlıq çərçivəsində son illərdə səhiyyə, tibbi təhsil və tibb elmi sahələrində sıx əlaqələr formalaşıb. Bu əlaqələr praktiki məzmun daşıyır və həyata keçirilən tədbirlər onların dərin və dinamik inkişaf edən xarakterini əks etdirir. Rusiya-Azərbaycan əməkdaşlığı təhsil və elm sahəsində sabit məzmunu və davamlı inkişafı ilə seçilir. Buraya birgə təhsil proqramlarının həyata keçirilməsi, Azərbaycanın və Rusiya Federasiyasının bir sıra ali təhsil müəssisələri arasında əməkdaşlıq, ikili diplom proqramlarının reallaşdırılması, tələbələrin akademik mobilliyinin genişləndirilməsi və digər istiqamətlər daxildir”.
Ə.Əhmədov qeyd edib ki, yuxarıda qeyd olunan məsələlərin müzakirəsi parlamentlərarası dialoqun daha da inkişafı, humanitar əməkdaşlığın möhkəmləndirilməsi, elmi-təhsil mübadilələrinin genişləndirilməsi və səhiyyə sahəsində əməkdaşlığın dərinləşdirilməsi baxımından mühüm mərhələ olacaq.
“Bu istiqamətlər üzrə əməkdaşlığın ardıcıl inkişafı xalqlarımızın ümumi maraqlarına cavab verir, peşəkar icmalar arasında etimadı möhkəmləndirir və tərəfdaşlığın daha da genişləndirilməsi üçün möhkəm zəmin yaradır”, - deyə o çıxışını yekunlaşdırıb.
