Azərbaycanın böyük bəstəkarı Oqtay Kazıminin ailə üzvlərinin təşəbbüsü, millət vəkili Qənirə Paşayevanın və Respublikanın əməkdar artisti Aybəniz Haşımovanın ideya müəllifi olduğu Oqtay Kazıminin 80 iilik yubileyi günü ilə bağlı onun musiqiləri əsasında hazırlanmış ''Ağla mənim üçün bu şəhər və Sən'' adlı layihənin təqdimatı keçirilib. Modern.az xəbər verir ki, millət vəkili Qənirə Paşayevanın rəhbərlik etdiyi Avrasiya Beynəlxalq Araşdırmalar İnstitutu İB-nin dəstəyi və təşkilatçılığı ilə həyata keçirilən gecədə ölkəmizin tanınmış ziyalıları, ictimayyət nümayəndələri, sənət adamları, Oqtay Kazıminin ailə üzvləri və yaxınları, KİV-nin münayəndələri iştirak edib. Qeyd edək ki, ailə üzvlərinin təşəbbüsü və ideyası ilə görkəmli bəstəkar Oqtay Kazıminin indiyədək işıq üzü görməyən bir sıra musiqilərinə, mahnılarına Qənirə Paşayeva sözlər yazıb. Eyni zamanda görkəmli bəstəkarın bəzi əsərləri yenidən işlənərək yeni aranjımanda təqdim olunub, həmin musiqilərə, mahnılara da sözlər ailə üzvlərinin təşəbbüsü ilə Qənirə Paşayeva tərəfindən yazılıb. 7 mahnı, 1 duet şəklində təqdim olunacaq musiqiləri Oqtay Kazımiyə sözləri Qənirə Paşayevaya aid olan layihənin təqdimat mərasiminə, gecə və konsertə aparıcılığı layihənin musiqi rəhbəri, Azərbaycanın Əməkdar atristi Aybəniz Haşımova edib. “Oqtay Kazımi mənə sənətdə də, həyatda da atalıq edib”, - deyən Aybəniz Haşımova onun həm böyük bir bəstəkar kimi yaradıcılığı barədə geniş məlumat verməklə bərabər onun gözəl bir insan kimi keyfiyyətlərindən də danışıb və xatirələrini bölüşüb. Layihə haqqında danışan millət vəkili Qənirə Paşayeva isə çıxışında bildirib ki, o, dünya səviyyəli böyük bəstəkar Oqtay Kazımini yaxından tanımaq şərəfində nail olduğu üçün özünü xoşbəxt hiss edir:
“Oqtay müəllim bəstəkar kimi böyük bəstəkar olmaqla yanaşı insan kimi də böyük insan idi. Saf, səmimi, dürüst, mehriban, insanı anlayan Oqtay müəllimin musiqilərinə söz yazmaq mənim üçün böyük şərəf olmaqla bərabər böyük bir məsuliyyət idi. Çünki bu musiqilər hazır musiqilər idi və onları dahi Oqtay Kazımi yazmışdı”, - deyən millət vəkili Qənirə Paşayeva bəstəkarın ailə üzvlərinə ona belə bir etimad göstərdikləri üçün təşəkkür etməklə bərabər layihənin musiqi rəhbəri, dostu Aybəniz Haşımovaya da bu layihənin reallaşmasındakı böyük əməyinə görə təşəkkür edib. “Nə qədər Azərbaycan və mədəniyyətimiz, musiqimiz var Oqtay Kazımi də olacaq”, - deyən millət vəkili Qənirə Paşayeva layihənin yaxın günlərdə albom şəklində buraxılacağını və dinləyicilərin ixtiyarına veriləcəyini də deyib.
Tədbirdə çıxış edən Bəstəkarlar İttifaqının katibi Sərdar Fərəcov Oqtay Kazıminin böyük bəstəkar kimi musiqi mədəniyyətimizə verdiyi böyük töhfələrdən danışıb və belə bir maraqlı layihəni həyata keçirən insanlara təşəkkür edib. Oqtay Kazıminin dostu və qonşusu bəstəkar Tahir Əkbər, tələbəsi, Azərbaycanın Xalq Artisti Canəli Əkbərov, onunla uzun illər birgə teatr tamaşalarında işləyən rejissor Cənnət Səlimova, şair-publisist Abdulla Qurbanı, gözəl şairimiz və Oqtay Kazımi ilə uzun illər həm yaradıcılıq əməkdaşlığı həm də dostluq edən cabir Novruzun övladı Müşfiq bəy çıxış edərək Oqtay Kazımi yaradıcılığının böyüklüyü ilə bərabər onun insan kimi də böyüklüyündən danışıb, xatirələrini bölüşüb və belə bir layihəni həyata keçirdikləri üçün təşkilatçılara təşəkkürlərini bildiriblər. Ailə adından Oqtay Kazıminin nəvəsi Çinarə Kazımi çıxış edərək babası haqqında işıqlı xatirələrindən danışıb və ailə adından layihəni həyata keçirənlərə təşəkkürlərini çatdırıb. Azərbaycanın Əməkdar Artistləri Aybəniz Haşımova, Gülyanaq Məmmədova, Firuzə İbadova, gənc və istedadlı sənətçilər Ayaz Qasımov və Aynişan Quliyeva tərəfindən layihədəki əsərlər ifa olunub. Dan Ulduzu ansamblı və gözəl pianist Naibə xanımın ifasında əsərlər hər kəsin alqışları ilə qarşılanıb.
Modern.az
