“Artıq Səhiyyə naziri “Koronovirus”la bağlı əmr imzalayıb və lazımi tədbilər görülüb. Amma buna rəğmən, virusun Azərbaycana yayılması riski davam edir. Heç kim bu riskdən sığortalanmayıb”.

Bunu Modern.az-a açıqlamasında Azərbaycan Tibb Universitetinin dosenti, respublikanın baş infeksionisti Cəlal İsayev bildirib.

O, qeyd edib ki, Çinlə olan əlaqələr bu riskin artmasına əsas səbəbdir:

“Bu xəstəlik insandan insana o vaxt ötürülür ki, çox sıx təmas olsun. Çin əhalisi yüksək sıxlığa malik olsa da, 12 milyonluq şəhərdə cəmi 3 minə yaxın insan virusa yoluxub. Bu o deməkdir ki, kontakt əlaqələrdən keçirilicik zəifdir. Ölüm faizi isə 3 faizə qədərdir”.

Həkimin tövsiyəsi infeksiya səngiyənədək xəstəlik yayılan regiona səfərlərin təxirə salınmasıdır:

“Yox, əgər mütləq getməlisinizsə, onda təhlükəsizlik tədbirlərini gücləndirməlisiniz. Çin hökuməti çox güclüdür. Çinin başqa yardıma ehtiyacı yoxdur. “Sars” virusunu necə lokallaşdırdılarsa, bu virus da eləcə lokallaşdırılacaq”.

C.İsayev deyib ki, virus əvvəlcə yarasalarda aşkarlanıb:

“Daha sonra ilana keçib. Çinlilər də ilanla qidalandıqlarına görə bu virusa yoluxublar”.

Baş infeksionist bildirib ki, virusun Çindən gətirilən mal-məhsulla, poçt bağlamaları ilə Azərbaycana keçirilmə ehtimalı yoxdur:

“Çünki viruslar xarici mühit tədbirlərinə son dərəcə həssasdırlar. 37 dərəcə temperaturda 15 dəqiqəyə, 56 dərəcədə isə dərhal tələf olur. Virus otaq temperaturunda 3 saat qaldığı halda məhv olur. Viruslar sənaye şəraitində texniki işlənmədən keçdiyindən onun insana keçməsi mümkünsüz görünür. Amma mümkünsüz heç nə yoxdur. Ona görə də həm Çindən gələnlər, həm də Çinə gedənlər təyyarədən düşən kimi yoxlamdan keçməlidirlər”.