Şamaxı rayonunda özünü iş icraçısı kimi təqdim edən şəxsin qanunsuz əməlləri ifşa edilib. Baş Prokurorluğun mətbuat xidmətindən Modern.az-a verilən məlumata görə, Şamaxı rayon sakini Əsgərov Pərvin Pərviz oğlunun Hüseynov Ramiz Məmmədəli oğlu tərəfindən aldadılaraq pulunun mənimsənilməsi barədə Baş prokuror yanında Korrupsiyaya qarşı mübarizə idarəsinin "161-Qaynar xətt" əlaqə mərkəzinə daxil olmuş müraciəti araşdırılıb.
Müəyyən edilib ki, R.Hüseynov özünü iş icraçısı kimi təqdim etməklə P.Əsgərovun etibarından sui-istifadə edərək Bakı şəhərində elektrik stansiyasına mühafizəçi vəzifəsinə işə düzəldəcəyi adı ilə aldadaraq 20 may 2012-ci il tarixdə ondan 1.800 manat məbləğində pul almaqla dələduzluq edibdir.
Fakta görə Cinayət Məcəlləsinin 178.2.4-cü (dələduzluq) maddəsi ilə cinayət işi başlanıbdır.
Hazırda iş üzrə istintaq davam etdirilir.
Modern.az
