İyulun 14-də mətbuatımızın banisi Həsən bəy Zərdabinin 170 illik yubileyi və Azərbaycan milli mətbuatının 137 illiyi münasibətilə bağlı bir qrup tanınmış media nümayəndəsi Zərdaba və Gəncəyə səfər edib.
KİV təmsilçiləri Həsən bəy Zərdabinin ev muzeyinə baş çəkiblər.
Media nümayəndələri Gəncə Mətbuat Evinin təməlqoyma mərasimində iştirak ediblər. Onlara bildirilib ki, ümumi sahəsi 2600 kvadratmetr olacaq 4 mərtəbəli binanın bir il ərzində inşası nəzərdə tutulur. Mətbuat evi təkcə Gəncə deyil, bütövlükdə region jurnalistləri üçün mərkəz rolunu oynayacaq. Burada konfrans zalları, müxtəlif inzibati otaqlar, qonaq evi və mətbəə fəaliyyət göstərəcək. Binanın müasir texniki avadanlıqlarla təchizatı istiqamətində müvafiq işlər reallaşdırılacaq.
Gəncədəki konfransda iştirak edən Prezident Administrasiyasının ictimai-siyasi məsələlər şöbəsinin müdiri Əli Həsənov bildirib ki, ölkə ictimaiyyəti görkəmli maarifçi alim, pedaqoq, azərbaycanşünas, milli mətbuatımızın banisi, gözəl ziyalı Həsən bəy Zərdabinin 170 illik yubileyi münasibətilə Gəncə şəhərində baş tutan konfransın simasında mühüm bir hadisəyə şahidlik edir.
«Həsən bəy Zərdabi o dövrdə ən ali məqsədli ziyalının edə biləcəyi işləri görüb. Ona görə də ümummilli liderimiz Heydər Əliyev hələ 1995-ci ildə Azərbaycanda milli mətbuatın ilk yubiley ənənəsini qoyaraq faktiki olaraq Həsən bəy Zərdabinin adını dövlət səviyyəsində əbədiləşdirdi. Həmin il 22 iyulun Azərbaycan Milli Mətbuat Günü kimi qeyd edilməsinə dair sərəncam imzaladı. Doğrudur, buna qədər də qeyri-rəsmi səviyyədə milli mətbuat günü qeyd edilirdi. Amma sənəd əlamətdar tarixin keçirilməsinin davamlı xarakter almasının əsasını qoydu».
Konfransda Milli Məclisinin deputatı, Mətbuat Şurası İdarə Heyətinin üzvü, «Azərbaycan» qəzetinin baş redaktoru Bəxtiyar Sadıqov, «Yeni Azərbaycan» qəzetinin baş redaktoru Hikmət Babaoğlu, Azərbaycan Jurnalistlər Birliyinin sədri, «Ayna-Zerkalo» qəzetinin baş redaktoru Elçin Şıxlı, «525-ci qəzet»in baş redaktoru Rəşad Məcid, deputat Jalə Əliyeva, «Yeni Müsavat» qəzetinin baş redaktoru Rauf Arifoğlu, «Kaspi» qəzetinin baş redaktoru Natiq Məmmədli də Həsən bəy Zərdabinin çoxşaxəli ictimai fəaliyyəti barədə danışıblar.
Modern.az
