Korrupsiyaya qarşı mübarizə idarəsinə çağrılmağımın səbəbini bilmirəm | Modern.az

Klassik Xalq Cəbhəsi Partiyasının (KXCP) sədri Mirmahmud Mirəlioğlu onun Baş Prokuror yanında  Korrupsiyaya qarşı mübarizə idarəsinə çağırılması ilə bağlı Modern.az saytına açıqlama verib.

M.Mirəlioğlu Korrupsiyaya qarşı mübarizə idarəsinə nə üçün çağırılmasından xəbərsiz olduğunu və bununla bağlı ona çağırış gəldiyini deyib. “Sözün açığı mən də bilmirəm nə üçün çağırıblar. Bununla bağlı heç bir məlumatım yoxdur. Sadəcə olaraq mənə Korrupsiyaya qarşı mübarizə idarəsinə gəlmək barədə çağırış olub. Gedək görək nə məsələdir...”, - deyə KXCP sədri bildirib.

Qeyd edək ki,  partiyanın mətbuat xidmətindən Modern.az-a daxil olan məlumata görə, Mirmahmud Mirəlioğlundan 112026126 saylı cinayət işinin istintaqı ilə əlaqədar bu gün saat 15.00-da idarəyə gəlməyi xahiş olunur. KXCP sədrinin təşkilat  məsələləri üzrə müavini Xəzər Teyyublu və əlaqələr üzrə müavin Fkrət Cəfərov da Baş prokuror yanında Korrupsiyaya qarşı mübarizə idarəsinə çağrılıb.

Anar RÜSTƏMOV