Hakim Yeni Azərbaycan Partiyasının (YAP) sədr müavini, icra katibi Əli Əhmədov 2013-cü ildə keçiriləcək prezident seçkisində partiyanın vahid namizədinin partiyanın sədri, hazırkı Prezident İlham Əliyev olacağını bildirib.
Modern.az-ın məlumatına görə, YAP rəsmisi bu barədə jurnalistlərə açıqlamasında qeyd edib:
"Mən belə hesab edirəm ki, bir sıra mətbuat orqanları YAP-ın namizədi məsələsi ilə bağlı təxribatla məşğuldur. YAP-ın namizədi Azərbaycan xalqının ürəyincə olan bir namizəddir. Dəfələrlə bəyan etmişik ki, YAP-ın sədri, Prezident İlham Əliyevin namizədliyi nəinki partiyanın 600 min üzvü, eyni zamanda xalqın əksəriyyəti tərəfindən dəstəklənir".
Əli Əhmədov YAP-ın qurultayı ilə bağlı məsələyə toxunaraq bildirib ki, prezident seçkisinə müvafiq olaraq hakim partiya qurultayını keçirməyi planlaşdırır ki, seçki ərəfəsində müəyyənləşdirdiyi namizədi rəsmi şəkildə irəli sürsün.
Modern.az
