Bu gün XXX London Yay Olimpiadasında daha iki güləşçimiz döşək üzərinə çıxıb. Modern.az-ın məlumatına görə, güləşçilərimizdən Həsən Əliyev (60 kq) və Saman Təhmasibi (84 kq) medal qazanmaq uğrunda mübarizə aparıblar. Yarışmaya 1/8 finaldan başlayan Həsən Əliyev bu mərhələdə norveçli Andre Berqe Stiqlə üz-üzə gəlib. Rəqibindən üstün olan H.Əliyev 1/4 finala adlayıb.
1/4 finalda Cənubu Koreya güləşçisinə qalib gələn Həsən 1/2 finala çıxıb. Onun final yolundakı rəqib isə qonşu Gürcüstan təmsilçisi - Revaz Laşxi olub. Təəssüf ki, idmançımız bu gərgin görüşdən məğlub ayrılıb və qızıl medal şansını itirib. Amma o, hələ bürünc medal qazana bilər.
Digər təmsilçimiz Saman Təhmasibi də yarışa 1/8 finaldan qoşulub. Güləşçimiz ilk görüşündə Gürcüstan təmsilçisi Vladimir Gegeşidze ilə qarşılaşıb. Əlavə hissədə rəqibinə uduzan idmançımız elə ilk görüşündə mübarizəni dayandırıb.
Xatırladaq ki, Londona 5 Yunan-Roma güləşçisi ilə yollanan millimizin 2 təmsilçisi artıq çıxışlarını medalla başa vurub. Bunlardan Rövşən Bayramov ölkəmizə gümüş, Emin Əhmədov isə bürünc medal qazandırıb.
Modern.az
