Tədbirdə deputatlar rekordçulara öz tövsiyələrini verdilər
Bu gün Parlament Jurnalistlər Birliyinin təşkilatçılığı ilə Modern.az saytının ofisində 2012/2013-ci tədris ili üçün ali təhsil müəssisələrinə keçirilən qəbul imtahanlarında 700 bal toplayan 5 abituriyentin deputat və jurnalistlərlə görüşü keçirilib.
Tədbiri giriş sözü ilə açan Parlament Jurnalistlər Birliyinin sədri Elşad Eyvazlı rekord nəticə göstərən abituriyentləri təbrik edib. Daha sonra deputatlar çıxış ediblər.
Millət vəkilləri Sahibə Qafarova, Fuad Muradov, Rövşən Rzayev öz növbələrində gələcək tələbələri təbrik edib
Öncə deputat Sahibə Qafarova bir müəllim və ana kimi gələcək tələbələrə öz tövsiyələrini verib. O bildirib ki, 700 bal toplamış 5 gəncin həm Azərbaycanda, həm də xaricdə təhsil almaq seçimləri var.
“Dövlət bunun üçün onlara şərait yaradır. Və qeyd etmək istəyirəm ki, onlar dünyanın harasında olurlarsa, olsunlar Qarabağı heç vaxt unutmasınlar”.
Millət vəkili Rövşən Rzayev isə onlara daim başqa ölkələrdə də Azərbaycanın ərazi bütövlüyünü təbliğ etməyi məsləhət görüb.
Deputat Fuad Muradov isə Prezident İlham Əliyevin təhsilimizə olan diqqət və qayğısından danışıb. O bildirib ki, əvvəlki illərlə müqayisədə bu gün gənclərə diqqət xeyli artıb.
“Dövlətin sizdən istəyi odur ki, hər zaman belə təhsilli, savadlı gənclərimiz olsun. Mənim isə ən əsas xahişim odur ki, dövlətçiliyimizi, Azərbaycan vətəndaşı olmağınızı göz önünə alasınız”.
Qeyd edək ki, II qrup üzrə iki nəfər Qazax rayonun Ürkməzli kənd sakini Orxan Səfərov, Türkiyə Diyanət Vəqfi Bakı Türk Liseyinin məzunu Nərgiz Məzahirqızı, III qrup üzrə Sabunçu rayon 72 saylı məktəb-liseyin məzunu Xeyransa Əliyeva, IV qrup üzrə Türkiyə Diyanət Vəqfi Bakı Türk Liseyinin məzunları Kamran Həmidov və Kamil Sərdarlı 700 bal toplayaraq bu il ən yüksək nəticə göstəriblər.
Türkiyə Dəyanət Vəqfi Bakı Türk Liseyinin müdiri Kadir Bektaşoğlu dəvət üçün təşəkkür edərək bildirib ki, o, öz tələblərindən daha çox Qaxazlı abituriyentin uğuruna sevinib.
