Hazırda Azərbaycan Respublikasının müxtəlif ölkələrdə diplomatik korpusları – səfirlik, konsulluq, daimi nümayəndəliyi fəaliyyət göstərir.
Modern.az saytı Azərbaycan Respublikasının xarici ölkələrdəki diplomatik korpuslarına rəhbərlik edən diplomatlar barəsində silsilə yazılar təqdim edir. Bu yazılarda səfir, konsul və daimi nümayəndələrimiz barədə qısa məlumat verməyə çalışırıq.
Beləliklə, Azərbaycanın Argentinadakı səfirini tanıyırsınızmı?
Azərbaycanın Argentinadakı səfiri Məmməd Bahəddin oğlu Əhmədzadə 4 oktyabr 1976-cı ildə Bakıda anadan olub. 1993-cü ildə Bakı şəhəri 52 saylı orta məkt əbi bitirib. Həmin ildə də Bakı Dövl ət Universitetinin Beynəlxalq münasibətlər və beynəlxalq hüquq fakültəsinin beynəlxalq münasibətlər ixtisasına daxil olub. 1997-ci ildə həmin ixtisas üzrə bakalavr, 2000-ci ildə isə magistraturanı fərqlənmə diplomları ilə bitirib. 1998-1999-cu illərdə İtaliyanın Milan şəhərində "Scuola Superiore Enrico Mattei" Beynəlxalq Araşdırma İnstitutunda (İtaliya) təhsil alaraq, enerji və ətraf mühitin iqtisadiyyatı və idarə edilməsi üzrə magistr diplomu alıb.
2001-2003-cü illərdə Azərbaycan Dövlət İqtisad Universitetində dünya təsərrüfatı və beynəlxalq iqtisadi əlaqələr ixtisası üzrə aspirantura təhsili alıb.
1997-1999-cu illərdə Azərbaycan Respublikası Dövlət Neft Şirkətinin Xarici Sərmayələr İdarəsində aparıcı və baş mütəxəssis, 2000-2003-cü illərdə İtaliya Milli Xarici Ticarət İnstitutunun (İCE) Bakı filialında ölkə üzrə koordinator vəzifələrində çalışıb.
2000-2003-cü illərdə Bakı Dövlət Universitetinin beynəlxalq münasibətlər kafedrasının müəllimi olub. 2003-2007-ci illər ərzində Azərbaycan Respublikasının İtaliya Respublikasındakı Səfirliyində attaşe, üçüncü və ikinci katib vəzifələrində çalışıb.
2007-2010-cu illərdə Xarici İşlər Nazirliyində ikinci katib, daha sonra nazirin köməkçisi və nazirin katibliyinin rəisi vəzifərində çalışıb. 2009-cu ildə Azərbaycan Respublikası Diplomatik Xidmətinin 90 illik yubileyi medalı ilə təltif olunub. Prezidentin 25 may 2010-cu il tarixli sərəncamı ilə Azərbaycan Respublikasının Argentina Respublikasında fövqəladə və səlahiyyətli səfiri təyin edilib. 2011-ci ildən etibarən iqamətgahı Buenos-Ayres şəhərində olmaqla, Azərbaycan Respublikasının Çili, Uruqvay, Boliviya və Paraqvayda da fövqəladə və səlahiyytli səfiridir.
Səfir italyan, ispan, ingilis və rus dillərini bilir.
Evlidir, iki övladı var.
Nihadə Eyyubova
