Azərbaycanlı deputat beynəlxalq simpoziumda Ermənistanı bölgəyə böyük əngəl adlandırıb | Modern.az

Türkiyənin Giresun Universitetində  Qara  Dəniz Strateji Araşdırma və Uyqulama Mərkəzi (KARASAM) tərəfindən təşkil edilən və  Qara Dəniz İqtisadi Əməkdaşlıq Təşkilatına üzv ölkələrin siyasətçilərinin, alimlərinin, universitet rəsmilərinin, qeyri-hökumət təmsilçilərinin qatıldığı  5-ci Qara Dəniz  Beynəlxalq Simpoziumunda çıxışı zamanı millət vəkili Qənirə Paşayeva Ermənistanın  işğalçılıq  siyasətindən, 20 ildən artıqdır ki, Azərbaycan torpaqlarının  20 faizini işğal altında saxlamasından, 20 ildən artıqdır ki, öz evlərinə dönə bilməyən azəbaycanlı  qaçqın  və  məcburi köçkünlərin Ermənistan tərəfindən tapdalanmaqda  davam edən haqlarından danışıb.
Qənirə  Paşayeva  Ermənistanı  insan  haqlarını ən  kobud  və  ən çox pozan ölkə adlandırıb və bildirib ki, işğalçı  Ermənistan bu bölgədə əməkdaşlığın genişlənməsinə ən böyük əngəldir. Qara Dəniz  İqtisadi  Əməkdaşlıq Təşkilatına üzv olan Ermənistanın təşkilatın  digər  üzvü  Azərbaycanın torpaqlarını  işğal etdiyini  və 20 ildən artıqdır ki,  işğaldan  azad  etmədiyini  vurğulayan millət vəkili bu  gün  qurumun  bir  üzvü digərinin torpaqlarını işğalda saxlamaqda davam edirsə, bu bölgədə əməkdaşlığın daha da genişlənməsinə ən böyük əngəl elə həmin ölkə Ermənistandır deyib.
Ermənistanın Azərbaycan torpaqlarını işğalda saxlamaqla bərabər Türkiyənin sərhədlərini tanımadığını, torpaq iddiası irəli sürdüyünü  və  qondarma erməni  soyqırımı  yalanlarını  dünyaya yaymaqda davam etdiyini deyən millət vəkili Qənirə Paşayeva  Ermənistanın bu cür işğalçı və qonşularına qarşı yürütdüyü bu cür mənfi  siyasətlə bölgənin inkişafına da ciddi zərər vurduğunu deyib. 
Millət vəkili  Qara Dəniz  İqtisadi  Əməkdaşlıq Təşkilatının 20 ildir fəaliyyət göstərməsinə baxmayaraq istənilən səviyyədə, effektivli çalışa bilmədiyini və bunun bölgədəki ölkələrin bir çoxunun bir-biri ilə ciddi gərginliklər yaşamalarından qaynaqlandığını ifadə edib.

"Bu  bölgə  böyük  və  önəmli, böyük bir potensiala da sahibdir. Əgər bu potensialdan  daha  yaxşı  istifadə  edə  bilsək  və  əməkdaşlığı  daha yaxşı qura bilsək,  bölgədəki  dövlətlərin  və  ümumiyyətlə bölgənin daha da inkişaf etməsi mümkün olar. Bunu üçün isə ilk öncə bölgədəki işğallar bitməli, münaqişələr öz həllini tapmalıdır. Ermənistana  beynəlxalq  təşkilatların qəbul etdiyi qətnamələrin yerinə yetirilməsi istiqamətində  beynəlxalq təşkilatların, o cümlədən Qara Dəniz İqtisadi Əməkdaşlıq Təşkilatının da təzyiqlər artmalıdır. Beynəlxalq ictimaiyyət 20 ildən artıqdır ki, 1miyon azərbaycanlı qaçqın və məcburu köçkünün öz evinə dönə bilməməsinə artıq laqeyid yanaşmamalı və onların evlərinə dönə bilməsi üçün Ermənistana ciddi təzyiqlər etməlidir", - Qənirə Paşayeva deyib.

“Bu gün modern dünyanın gözü qarşısında Ermənistan 1 milyon insanın haqlarını kobud şəkildə tapdalamaqda davam edirsə, beynəlxalq təşkilatlar, ictimaiyyət laqeyid qalmamalı, bu faciənin aradan qaldırılması istiqamətində səylərini daha da artırmalı, beynəlxalq təşkilatların qəbul etdiyi qətnamələrin həyata keçməsi istiqamətində Ermənistana təzyiq edilməlidir. Məhz bu təzyiqin olmaması üzündən Ermənistan bu gün də işğalçılıq əməllərini davam etdirir", - deyən Qənirə Paşayeva  problemin həlli istiqamətində Azərbaycanın göstərdiyi səylərdən və Ermənistanın destruktiv mövqeyindən də danışıb.

  " Ermənistan işğal etdiyi Azərbaycan torpaqlarından geri çəkilmədikcə, məcburi köçkünlər və qaçqınlar evlərinə dönmədikcə, iki ölkə arasında əməkdaşlıq da mümkün deyil. Torpağınızı  işğal  edən bir dövlətlə əməkdaşlıq edərsinizmi? Təbii ki, yox. Biz də heç zaman edə bilmərik. Ermənistanla əməkdaşlığı bərpa etmənin tək yolu  rəsmi İrəvanın işğal etdiyi Azərbaycan torpaqlarını azad etməsindən, azərbaycanlı qaçqın və məcburi köçkünlərin öz evlərinə dönməsindən keçir. Bu məsələni gələcək nəsillər buraxmamalıyıq, gələcək nəsillər üçün bu məsələni həll  etmək daha çətin olar. Biz  Azərbaycan olaraq  sülh,  barış istəyirik. Biz istəyirik ki, Ermənistan işğal etdiyi Azərbaycan torpaqlarını sülh yolu ilə boşaltsın, tərk etsin. Amma təssüf  ki, Ermənistan  bu  sülhün yaranması üçün heç bir addım atmır. Biz bu  münaqişənin tezliklə sülh yolu ilə həll olunmasını istəyirik.  Çünki torpaqlarımız işğal altındadır  və 1 milyon insan öz evinə dönə bilmir. Düşünün əgər siz atanızın, ananızın, övladınızın qəbrini  20  il ziyarət edə bilməsəniz, evinizi 20 ildə  bir  dəfə   də  olsa görə bilməsəniz hansı faciəvi hisslər yaşayarsınız? Bu barədə düşünmək belə sizin üçün çətin olacaq. O, insanıların yerində özünüzü bir dəqiqəlik  hiss edin. O zaman onların ağrılarını, acılarını daha yaxşı anlayacaqsınız. Təbii ki, biz münaqişənin həllini istəyən tərəfik amma Ermənistanda münaqişənin sülh yolu ilə həlli istiqamətində heç bir addım atmamaqla  bölgədə  vəziyyəti  daha da gərginləşdirir.  Bütün bölgə  ölkələri bu barədə ciddi düşünməlidir. Bölgədə vəziyyətin daha da gərginləşməsi təkcə əməkdaşlığın  genişlənməsinə  əngəl deyil,  daha böyük gərginliklərin əsasını qoyan dinamitlərdir”- millət vəkili Qənirə Paşayeva belə deyib və beynəlxalq təşkilatları və içtimaiyyəti münaqişənin həlli istiqamətində Ermənistana təzyiqlər etməyə çağırıb. Millət vəkili Beynəlxali Simpozium çərçivəsində müxtəlif ölkələrdən gəlmiş nümayəndə heyətləri ilə görüşüb və onların bu istiqamətdə suallarını da cavablandırıb.