Milli Məclisin deputatı Könül Nurullayevanın Modern.az saytına müsahibəsini təqdim edirik:
- Könül xanım, sizin ixtisasınız Avropaşünaslıq olsa da, fəaliyyətiniz əsasən idman sahəsinə bağlı olub. Bu sahəyə marağınız necə yarandı?
- Doğrudur, mənim ali təhsilim Avropaşünaslıq ixtisası üzrə olub. Lakin tələbəlik illərindən etibarən ictimai fəaliyyət, beynəlxalq əlaqələr və xüsusilə idman diplomatiyası sahəsinə böyük maraq göstərmişəm. İdman yalnız yarış və nəticələrdən ibarət deyil, o, ölkələrin tanıdılması, gənclərin inkişafı, sağlam həyat tərzinin təşviqi və beynəlxalq əməkdaşlıq üçün mühüm platformadır. Azərbaycanın son illərdə nüfuzlu beynəlxalq idman tədbirlərinə ev sahibliyi etməsi bu sahəyə marağımı daha da artırdı. Peşəkar fəaliyyətim zamanı idman layihələrində iştirak etdikcə, bu istiqamətdə həm təcrübə qazandım, həm də ölkəmizi beynəlxalq arenada təmsil etmək imkanları əldə etdim. Hesab edirəm ki, əsas məsələ əldə olunan bilik və bacarıqları müxtəlif istiqamətlərdə səmərəli şəkildə tətbiq edə bilməkdir.
- Azərbaycan son illərdə Formula 1, Birinci Avropa, İslam Həmrəyliyi və MDB Oyunları kimi nüfuzlu yarışlara ev sahibliyi edib. Bu cür beynəlxalq idman tədbirləri ölkəmizə hansı dividendləri qazandırır?
- Azərbaycanın Formula 1 Qran Prisi, Birinci Avropa Oyunları, İslam Həmrəyliyi Oyunları və MDB Oyunları kimi mötəbər beynəlxalq yarışlara ev sahibliyi etməsi ölkəmiz üçün çoxşaxəli əhəmiyyət daşıyır. İlk növbədə, bu tədbirlər Azərbaycanın dünyada tanıdılmasına, müasir, təhlükəsiz və dinamik inkişaf edən ölkə imicinin möhkəmlənməsinə xidmət edir. Minlərlə idmançı, nümayəndə heyəti və xarici qonağın ölkəmizə səfəri turizmin inkişafına, xidmət sektorunun canlanmasına və iqtisadi fəallığın artmasına müsbət təsir göstərir. Digər vacib məqam gənclərimizlə bağlıdır. Belə yarışlar idmana marağı artırır, sağlam həyat tərzini təşviq edir və yeni nəsli daha fəal olmağa həvəsləndirir. Eyni zamanda, beynəlxalq tədbirlərin təşkili sahəsində qazandığımız təcrübə ölkəmizin institusional potensialını gücləndirir və gələcəkdə daha böyük layihələrin həyata keçirilməsi üçün möhkəm zəmin yaradır. Bu yarışlar həm də Azərbaycanın mədəniyyətini, qonaqpərvərliyini və zəngin irsini dünya ictimaiyyətinə təqdim etmək baxımından mühüm platformadır. Ona görə də beynəlxalq idman tədbirlərinin dividendləri təkcə idman sahəsi ilə məhdudlaşmır, siyasi, iqtisadi, sosial və humanitar istiqamətləri də əhatə edir.
- Bəzi idman növlərində Azərbaycanı təmsil edən legioner idmançıların sayının çoxluğu cəmiyyətdə müzakirələrə səbəb olur. Sizcə, hazırda hansı idman növlərində yerli idmançıların sayı və rəqabət qabiliyyəti arzuolunan səviyyədə deyil? Bunun əsas səbəbləri nələrdir və vəziyyətin dəyişməsi üçün hansı addımlar atılmalıdır?
- Legioner idmançıların milli komandalarda çıxış etməsi müasir idmanda geniş yayılmış təcrübədir. Əsas məqsəd beynəlxalq arenada rəqabət qabiliyyətinin artırılması, təcrübə mübadiləsi və müəyyən idman növlərinin inkişafına təkan verməkdir. Bununla belə, uzunmüddətli perspektivdə prioritetimiz yerli idmançıların yetişdirilməsi və milli ehtiyat bazasının gücləndirilməsidir. İlk növbədə, uşaq və yeniyetmələrin müxtəlif idman növlərinə cəlb olunması, regionlarda məşq infrastrukturu, peşəkar məşqçi potensialı və davamlı inkişaf proqramları mühüm rol oynayır.
Azərbaycanın idman siyasətində də əsas diqqət idmanın kütləviliyinin artırılmasına, uşaq-gənclər idman məktəblərinin fəaliyyətinin daha da gücləndirilməsinə, regionlarda idman infrastrukturunun inkişafına və istedadlı gənclərin erkən yaşlardan aşkarlanaraq dəstəklənməsinə yönəlib. Eyni zamanda, peşəkar legioner idmançıların təcrübəsindən yerli idmançıların inkişafı üçün faydalanmaq da vacibdir. Düşünürəm ki, son illərdə bu istiqamətdə görülən işlər artıq müsbət nəticələr verməyə başlayıb və qarşıdakı dövrdə yerli idmançıların həm sayında, həm də uğurlarında daha böyük artımın şahidi olacağıq.
- Özünüz hansısa idman növləri ilə məşğul olursunuzmu?
- Mən əvvəllər uzun müddət üzgüçülük və tennislə məşğul olmuşam. Lakin hazırda vaxt məhdudiyyəti səbəbindən bu idman növləri ilə məşğul ola bilmirəm. Amma hər gün səhər saatlarında yürüşə çıxıram və bunu təbliğ edirəm. 1 ayda idmana 28-30 saat ayıra bilirəm.
- Azərbaycanın idman və siyasət mühitində qadın olmaq hansı üstünlükləri və çətinlikləri gətirib?
- Mən hesab edirəm ki, bu gün Azərbaycanda qadınların həm ictimai-siyasi həyatda, həm də müxtəlif peşə sahələrində fəal iştirak etməsi üçün geniş imkanlar mövcuddur. Dövlətimiz tərəfindən gender bərabərliyinin təmin olunması, qadınların rəhbər və qərarverici mövqelərdə təmsilçiliyinin artırılması istiqamətində ardıcıl siyasət həyata keçirilir. Bu da qadınların öz potensialını reallaşdırması üçün əlverişli mühit yaradır. İdman və siyasət hər ikisi yüksək məsuliyyət, peşəkarlıq və davamlı inkişaf tələb edən sahələrdir. Bu mühitlərdə fəaliyyət göstərərkən əsas meyarın insanın bilikləri, bacarıqları, işə yanaşması və əldə etdiyi nəticələr olduğunu düşünürəm. Əlbəttə, bəzi hallarda qadınlar həm peşəkar fəaliyyət, həm də ailə məsuliyyətləri arasında balans qurmaq kimi əlavə çağırışlarla üzləşə bilirlər. Lakin düzgün planlama, əzm və dəstək sayəsində bu çətinliklərin öhdəsindən gəlmək mümkündür. Digər tərəfdən, qadınların idarəçilikdə, siyasətdə və idman sahəsində uğurları gənc qızlar üçün də motivasiya mənbəyidir. Onlar görürlər ki, zəhmət, bilik və məqsədyönlülük sayəsində istənilən sahədə uğur qazanmaq mümkündür. Mən hesab edirəm ki, cəmiyyətlərin inkişafı qadınların və kişilərin potensialından bərabər şəkildə faydalanmağı tələb edir və bu istiqamətdə son illərdə müsbət dinamikanın şahidi oluruq. Əsas məqsəd gənclərə, xüsusilə də gənc qızlara öz qabiliyyətlərinə inanmaq və qarşılarına qoyduqları hədəflərə inamla addımlamaq üçün stimul verməkdir.
- İdman sahəsində uzun müddət fəaliyyət göstərən biri kimi həm də parlamentdə Gənclər və idman komitəsinin sədr müavinisiniz. Yaxın müddətdə “İdman haqqında” qanun layihəsi də müzakirə olunmalıdır. Bu layihədən əsas gözləntiləriniz nələrdir? O ümumilikdə idman sahəsindəki boşluqları doldura biləcəkmi?
- “İdman haqqında” yeni qanun layihəsindən əsas gözləntimiz ölkədə idman sahəsinin müasir tələblərə uyğun şəkildə daha sistemli və effektiv tənzimlənməsidir. Son illər Azərbaycanda idmanın inkişafı istiqamətində mühüm addımlar atılıb, beynəlxalq yarışlarda uğurlar əldə olunub. Azərbaycan nüfuzlu idman ölkəsinə çevrilib. Lakin sahənin inkişaf tempi qanunvericilik bazasının da yenilənməsini zəruri edir. Qanun layihəsinin əsas üstünlüklərindən biri idmanın idarə olunması, federasiyaların fəaliyyəti, peşəkar və həvəskar idmançıların hüquq və vəzifələri, məşqçilərin statusu, idman təhsili və maliyyələşdirmə mexanizmləri kimi məsələləri daha aydın şəkildə tənzimləməsidir. Eyni zamanda, gənclərin idmana cəlb olunması, regionlarda idman infrastrukturunun inkişafı, inklüziv və kütləvi idmanın təşviqi istiqamətində də yeni imkanlar yaradacağı gözlənilir.
Hesab edirəm ki, qanun layihəsi hazırda mövcud olan bir sıra boşluqların aradan qaldırılmasına ciddi töhfə verəcək. Bununla belə, istənilən qanunun effektivliyi təkcə onun qəbulundan deyil, həm də tətbiq mexanizmlərinin düzgün qurulmasından asılıdır. Əsas məqsəd qəbul ediləcək müddəaların praktikada işlək olmasını təmin etməkdir. Bu baxımdan əminəm ki, yeni qanun ölkədə idmanın davamlı inkişafı üçün mühüm hüquqi baza olacaq.
- Siz həm də Ailə, qadın və uşaq məsələləri komitəsinin üzvüsünüz. Cəmiyyətdə belə bir fikir var ki, qloballaşma və sosial şəbəkələrin təsiri ilə gənclər ənənəvi ailə dəyərlərindən uzaqlaşırlar. Siz bu fikirlə razısınızmı ?Azərbaycanda ailə institutunun qarşısında duran əsas çağırışlar nələrdir?
- Müasir informasiya mühiti gənclərin həyat tərzinə, dünyagörüşünə və ailə münasibətlərinə baxışına təsir göstərir. Lakin ailə dəyərlərindən uzaqlaşmanın bütün məsuliyyətini yalnız sosial şəbəkələrin üzərinə qoymaq da doğru deyil. Əksinə, sosial media düzgün istifadə olunduqda ailə dəyərlərinin təbliği, valideyn-övlad münasibətlərinin möhkəmləndirilməsi və maarifləndirmə baxımından faydalı vasitəyə çevrilə bilər.
Əsas məsələ ondan ibarətdir ki, gənclər ənənəvi dəyərlərlə müasir dünyanın tələbləri arasında balans qurmağı bacarsınlar. Bu baxımdan ailənin, məktəbin, ictimai institutların və medianın üzərinə mühüm vəzifələr düşür.
Hesab edirəm ki, ailə institutunun gücləndirilməsi üçün milli-mənəvi dəyərlərin qorunması ilə yanaşı, ailə psixologiyası üzrə maarifləndirmə işinin genişləndirilməsi, valideynlik bacarıqlarının təşviqi və sağlam ailə münasibətlərinin təbliği xüsusi əhəmiyyət daşıyır. Güclü ailə güclü cəmiyyətin təməlidir və bu istiqamətdə həm dövlət, həm vətəndaş cəmiyyəti, həm də media birgə fəaliyyət göstərməlidir.
- Sizin bir övladınız var. Onun maraq dairəsi və gələcəklə bağlı planları nə ilə bağlıdır? Ana kimi övladınızın seçimlərinə təsir etməyə çalışırsınız, yoxsa qərarlarında sərbəst olmasına üstünlük verirsiniz?
- Hər bir valideyn kimi mən də övladımın sağlam, xoşbəxt və savadlı bir insan kimi yetişməsi ən böyük arzumdur. Onun öz maraq dairəsi, sevdiyi məşğuliyyətlər və gələcəklə bağlı düşüncələri var. Mən hesab edirəm ki, uşaqların potensialını üzə çıxarmağın ən doğru yolu onların maraqlarını diqqətlə izləmək və inkişaf etdirmək üçün lazımi dəstəyi göstərməkdir.
Ana olaraq təbii ki, öz həyat təcrübəmi onunla bölüşür, müəyyən məsləhətlər verirəm. Ancaq eyni zamanda düşünürəm ki, hər bir insan öz yolunu özü seçməlidir. Buna görə də övladımın qərarlarında sərbəst olmasına, öz seçimlərini etməsinə və məsuliyyət daşımasına üstünlük verirəm. Valideynin rolu daha çox istiqamət göstərmək, düzgün dəyərlər aşılamaq və ehtiyac duyulduqda yanında olmaqdır.
Ən vacib hesab etdiyim məsələ onun hansı peşəni seçməsindən çox, seçdiyi sahədə peşəkar, vicdanlı və cəmiyyətə faydalı bir insan olmasıdır. Əgər insan öz işini sevərək görürsə və daim öz üzərində çalışırsa, uğur da mütləq gəlir. Mən də bir ana kimi onun arzularını və hədəflərini dəstəkləməyə çalışıram.
- Artıq uzun illərdir həm idman, həm də siyasət sahəsində aktiv fəaliyyət göstərirsiniz. Deputatlıq və ictimai fəaliyyət ailənizə ayırdığınız vaxta təsir edibmi? Bu balansı necə qoruyursunuz?
- Həm idman, həm də ictimai-siyasi fəaliyyət yüksək məsuliyyət, intizam və vaxt tələb edən sahələrdir. Təbii ki, deputatlıq fəaliyyəti, seçicilərlə görüşlər, komitə iclasları, beynəlxalq tədbirlər və müxtəlif ictimai layihələr gündəlik iş qrafikini kifayət qədər intensiv edir. Bu baxımdan ailəyə ayrılan vaxtı planlaşdırmaq bəzən çətin olsa da, mən hər zaman ailəni həyatımın ən böyük dayağı və prioritetlərindən biri hesab etmişəm.
Düşünürəm ki, balansı qorumağın əsas yolu vaxtı düzgün idarə etməkdən keçir. İş nə qədər gərgin olsa da, ailəmlə vaxt keçirməyə, onların sevinc və qayğılarını bölüşməyə çalışıram. Çünki insanın mənəvi gücü və motivasiyası böyük ölçüdə ailəsindən gəlir.
Eyni zamanda, ailəmin göstərdiyi anlayış və dəstək fəaliyyətimdə mühüm rol oynayır. Hesab edirəm ki, peşəkar uğur və ailə dəyərləri bir-birini tamamlamalıdır və bu tarazlığı qorumaq insanın həm şəxsi, həm də peşəkar inkişafı üçün vacibdir.
