Şəmkirdə kişi yaşadığı evi yandırıb.

Modern.az "Qafqazinfo"ya istinadən xəbər verir ki, hadisə rayonun Seyfəli kəndində baş verib.

Məlumata görə, kənd sakini, 1961-ci il təvəllüdlü Yaqubov Vəli Əkbər oğluna məxsus, 200 kvadratmetr sahəsi olan 5 otaqlı evdə baş verən yanğın zamanı ev sahibinin həyat yoldaşı - 1966-cı il təvəllüdlü Yaqubova Nüşabə, oğlu - 1988-ci il təvəllüdlü Vəliyev Əkbər, gəlini - 1988-ci il təvəllüdlü Vəliyeva Nərgiz və 4 yaşlı  nəvəsi Banu yanıq xəsarətləri alaraq Gəncə şəhər Təcili Tibbi Yardım Xəstəxanasına aparılıblar. V.Əkbər, V. Nərgiz və azyaşlı övladlarının vəziyyəti ağır olduğundan reanimasiyaya yerləşdiriliblər.

Hadisə yerinə FHN-nin Şəmkir Yanğından Mühafizə hissəsinin iki avtomobili və canlı qüvvəsi cəlb olunub. Alov tez bir zamanda söndürülüb.

İlkin məlumata görə, evi sahibi V. Yaqubov qəsdən yandırıb.

Faktla bağlı araşdırma aparılır.