Türkiyə Bəşər Əsədin simvolik olaraq prezident kimi 6 ay öz postunda qalmasına razılaşaraq Suriyada hakimiyyətin təhvil verilməsi planını dəstəkləməyə hazır olduğunu bildirib. Modern.az bildirir ki, bu haqda “Reuters” agentliyi Türkiyə hakimiyyətindəki iki yüksək vəzifəli məmura istinad edərək məlumat yayıb.
Mənbələrdən birinin sözlərinə görə, hazırda Suriya prezidentinin hakimiyyətdən uzaqlaşması planı üzərində iş gedir. “Bu məsələnin müzakirəsində ABŞ və digər müttəfiqlərimizlə müəyyən irəliləyişə nail olmuşuq. Biz hələ ki 6 ay müddətinin nə zaman başlayacağını dəqiq bilmirik, ancaq düşünürük ki, bu, kifayət qədər tez baş verəcək”, - anonimliyi qorunacağı təqdirdə mənbələrdən biri deyib. Suriyada vətəndaş müharibəsi 2011-ci ilin yazında başlayıb. Münaqişə nəticəsində ölənlərin sayı 230 min nəfəri ötüb. Ölkənin ərazisinin bir hissəsini İraq-Şam İslam Dövləti (İŞİD) terror qruplaşması ələ keçirib. ABŞ-ın rəhbərlik etdiyi beynəlxalq koalisiya İŞİD-in mövqelərinə havadan zərbələr endirir. Sentyabrın 30-da Suriyada İŞİD-ə qarşı Rusiya da hava əməliyyatlarına başlayıb. Aviasiya qrupunun tərkibinə 50 təyyarə və helikopter daxildir. Moskvanın hərbi yardımı üçün Bəşər Əsəd özü müraciət edib.
Modern.az
