Tusk: Ukraina oyiga 27 ming harbiyni yo'qotmoqda. Ukrainaning so'nggi paytlardagi oylik harbiy yo'qotishlari 27 ming kishiga yetdi.
Modern.az xabar berishicha, bu haqda Polsha Bosh vaziri Donald Tusk Kiyevdan olingan ma'lumotlarga tayanib ma'lum qildi.
Uning so'zlariga ko'ra, Rossiyaning yangi harbiy strategiyasi va reaktiv dvigatelli uchuvchisiz uchar apparatlari, shu jumladan, yangi texnik imkoniyatlari Ukraina tomonining yanada katta yo'qotishlarga duchor bo'lishiga sabab bo'lmoqda.
“So'nggi paytlarda har oyda halok bo'lganlar va yaralanganlar soni 27 ming kishini tashkil etmoqda. Afsuski, bu urush davrining rekord ko'rsatkichidir. Agar bu tendensiya davom etsa, Ukrainada qish haqiqatan ham falokatli tus olishi mumkin”, – dedi Tusk.
Polsha Bosh vaziri bundan oldin ham Rossiya Ukrainaning infratuzilmasi, logistika imkoniyatlari va iqtisodiyotiga qarshi hujumlarini kuchaytirishi mumkinligi haqida ogohlantirgan edi. U reaktiv dvigatelli dronlarni aniqlash qiyinroq ekanligini ta'kidladi.
