Armaniston hukumati vaqtincha nazorati ostida bo'lgan Ozarbayjonning Sadarak tumanidagi Karki qishlog'ida noqonuniy yashovchi aholini evakuatsiya qilishni muhokama qilmoqda.
Modern.az mahalliy OAVga tayanib xabar berishicha, Armaniston hududiy boshqaruv va infratuzilma vaziri David Xudatyan Bosh vazir Nikol Pashinyanga Karkida yashovchi arman aholisini boshqa hududga ko'chirish bo'yicha uchta variantni taqdim etgan.
Ma'lumotlarga ko'ra, Xudatyan taqdim etgan uchta variantdan ikkitasi amalda mavjud aholi punktlarining nomini o'zgartirib, Karkidan ko'chiriladigan aholini shu hududlarga joylashtirishni nazarda tutadi. Bundan tashqari, ko'chiriladigan aholi uchun qisqa muddatda bir necha o'nlab uylar qurilishi mumkin bo'lgan hudud ham aniqlangan.
Uchinchi variant esa Karki aholisiga kompensatsiya to'lash va ularni boshqa hududga ko'chirishdir.
Qayd etish joizki, Karki Ozarbayjonning Sadarak tumani hududida joylashgan, Armaniston nazoratidagi Ozarbayjon eksklavidir. Armaniston tomoni qishloqni Tigranashen deb ataydi. Nikol Pashinyan so'nggi bayonotlarida esa qishloqqa Ozarbayjon nomi bo'lgan “Karki” bilan murojaat qiladi va uning Armanistonning xalqaro miqyosda tan olingan 29 743 kvadrat kilometrlik hududiga kirmasligini bildiradi.
