Azərbaycan Prezidenti İlham Əliyevin Zəngəzur, Göyçə və İrəvana qayıdacağımızla bağlı dediklərində 10 noyabr bəyanatına istinad etməsi diqqət çəkir:
“Üçtərəfli 10 noyabr Bəyanatında göstərilir: Bütün qaçqınlar öz doğma torpaqlarına qayıtmalıdırlar. Bizim doğma torpağımız Zəngəzurdur, bizim doğma torpağımız Göyçə mahalıdır, İrəvandır. Biz qayıdacağıq, əlbəttə”.
Modern.az-ın məlumatına görə, siyasi şərhçi Asif Nərimanlı deyir ki, Azərbaycan Prezidenti zaman-zaman Zəngəzur, Göyçə və İrəvana qayıtmaqdan bəhs edib, lakin ilk dəfədir ki, bunu konkret sənədə istinadən vurğulayır.
Və bu o deməkdir ki:
- Rəsmi Bakının qaçqınların qayıdışı ilə bağlı gündəminə təkcə Qarabağ yox, Zəngəzur, İrəvan və Göyçə də daxildir və istisna deyil ki, məsələ qapalı danışıqlarda masaya qoyulub;
- Rəsmi Bakı azərbaycanlıların öz tarixi torpaqlarına – Zəngəzura, İrəvana, Göyçəyə qayıdışını beynəlxalq müstəvidə qaldırmağa hazırlaşır.
Ekspert Azərbaycan Prezidentinin bugünkü çıxışından aşağıdakı sitatı da xatırladıb:
“Əgər Şərqi Zəngəzur varsa, deməli Qərbi Zəngəzur da var. Bəli, Qərbi Zəngəzur bizim dədə-baba torpağımızdır. Demişəm ki, biz oraya qayıtmalıyıq... Mütləq qayıdacağıq, çünki bunun başqa yolu yoxdur”.
“İlham Əliyev sülhməramlıların nəzarətində olan ərazilər - Xankəndi, Xocalı və Xocavənd – haqda yekun qərarı da açıqlayır: “Dağlıq Qarabağ yoxdur, Qarabağ var. İyulun 7-də imzaladığım Fərman əsasında Qarabağ iqtisadi zonası yaradıldı, vəssalam. Bütün Qarabağa aid olan rayonlar orada birləşib”", siyasi şərhçi bildirib.
A.Nərimanlı deyir ki, rəsmi Bakı hədəflərini böyüdür:
“Qarabağ məsələsi bitdi, hədəf tarixi torpaqlara qayıdışdır – İrəvana, Zəngəzura, Göyçəyə... Bu, həm də Qarabağ məsələsinin bitdiyini qəbul etdirmək üçün strateji gedişlərdən biri hesab oluna bilər”.