Hazırda Azərbaycanda Qurban bayramı qeyd olunur. Bayramla əlaqədar hər kəs öz vəzifəsini icra etməyə, yəni qurban kəsib paylamağa çalışır.
Siyasi partiyaların Qurban bayramında hansı tədbirləri keçirəcəyi maraq doğurur.
Modern.az müxtəlif partiya sədrləri və siyasətçilər arasında sorğu keçirərək onların Qurban bayramı ilə bağlı planlarını öyrənib.
Böyük Quruluş Partiyasının başqanı, Milli Məclisin Mədəniyyət komitəsinin sədri Fazil Mustafa hər il olduğu kimi bu il də qurban payı payladıqlarını deyib:
“Qonşuluqda və çevrədə imkansız olduğunu bildiyimiz insanlara qurban paylayırıq. Bu bayram xeyirxahlıq bayramıdır və hər kəs əlindən gələni etməlidir”.
Azərbaycan Milli İstiqlal Partiyasının sədri, deputat Arzuxan Əlizadə bildirib ki, əvvəlki illərdə olduğu kimi bu il də müəyyən sosial qruplara dəstək göstərməyə çalışacaqlar:
“Əvvəlki dönəmlərdə Qurban bayramlarında və digər əlamətdar günlərdə imkanlarımız daxilində müəyyən sosial qruplara dəstək olmuşuq. Bu bayram günlərində də müəyyən ailələrlə təmasda olub onlara dəstəyimizi nümayiş etdirəcəyik”.
Milli Cəbhə Partiyasının sədri, deputat Razi Nurullayev də hər il olduğu kimi qurban kəsərək ehtiyac sahiblərinə paylamağı planlaşdırdıqlarını qeyd edib.
Ağ Partiyanın sədri Tural Abbaslı isə dini qaydalara uyğun şəkildə qurban kəsəcəklərini deyib:
“Biz də qurban kəsmək niyyətindəyik və onu dini qaydalara uyğun şəkildə paylayacağıq. Amma böyük və qeyri-adi nəsə planlaşdırmırıq. Allahdan arzum odur ki, hər kəsin qurban kəsməyə imkanı olsun. Elə bir vəziyyət olsun ki, heç qurban paylamağa adam tapılmasın”.
Ümid Partiyasının sədri İqbal Ağazadə bildirib ki, hər il olduğu kimi bu dəfə də müəyyən addımlar atmağa çalışırlar:
“Etdiklərimizi mətbuatda işıqlandırmağımız çox nadir hallarda olur. Amma həmişə bu məsələlər diqqətimizdə olub və imkanımız daxilində nə mümkündür etmişik”.
Vəhdət Partiyasının sədri Adəm Bakuvi deyib ki, Qurban bayramı dövründə ahıl insanlara və ehtiyacı olan ailələrə dəstək göstəriləcək:
“Bu yardımlar yalnız Bakıda olmayacaq. Rayon şöbələrimizin rəhbərləri və üzvlərimiz ianələr hesabına qurban payları paylayacaqlar. Yetimlərə, ahıllara və ehtiyacı olan ailələrə yardım olunacaq”.
Ədalət Partiyasının sədri Mütəllim Rəhimli Qurban bayramının artıq milli dəyərə çevrildiyini vurğulayıb:
“Qurban bayramı dini mahiyyətli olsa da, artıq xalqımız üçün milli bir dəyərə çevrilib. Təbii ki, hər kəs Qurban bayramında vacib olan rituallara əməl edir. Dinimizin tolerantlığı həm də ondadır ki, qurban kəsməyi məcburiyyət kimi qoymur, imkanlara görə tövsiyyə edir. Bu da kimsənin üstünlük qazanmasına və ya aşağılanmasına şərait yaratmır.
Bu bayramda qurban kəsməyi planlaşdırmamışam. Amma Qurban bayramının daha bir gözəlliyi də paylaşmaqdır. Yəqin ki, bayramın yaratdığı bu fürsətdən yararlana biləcəm”.
Azərbaycan Xalq Partiyasının sədri Qiyas Sadiqov isə bildirib ki, kəsdiyi qurbanları əsasən imkansız qonşularla bölüşür:
“Allah kəsilən bütün qurbanları qəbul etsin. Ramazan və Qurban bayramlarında ilk növbədə bayram namazı üçün məscidə gedirəm. Və kəsdiyim qurbanı əsasən imkanı zəif insanlarla paylaşmağa çalışıram”.
Yeni Zaman Partiyasının sədri Musa Ağayev bildirib ki, imkan daxilində sosial tədbirlər həyata keçirəcəklər:
“İmkansız insanlara qurban payları verəcəyik. İlk növbədə partiyada ehtiyacı olan insanlara dəstək olacağıq.Eyni zamanda sosial baxımdan imkansız insanlara da öz köməyimizi göstərməyə çalışacağıq.Nə qədər mümkündür sosial tədbirlər həyata keçirəcəyik”.
REAL Partiyasının sədri Natiq Cəfərli isə ailə ənənələrini davam etdirdiklərini bildirib:
“Qocalar evi və ya uşaq evlərinə müəyyən yardımlar etməyi düşünürük. Hər il buna çalışmışıq. Qurban bayramının fəlsəfəsini yaşamağa çalışırıq”.
Gələcək Azərbaycan Partiyasının sədri Ağasif Şakiroğlu isə qurbanların partiyanın ehtiyacı olan üzvlərinə və 17 nəfər partiya üzvü olmayan şəxslərə paylanacağını deyib: "Gələcək Azərbaycan Partiyası yalnız Qurban və digər əlamətdar günlərdə yox, il ərzində partiyanın ehtiyacı olan üzvlərinə sosialyönümlü-istər ərzaq, istərsə də maddi baxımdan dəstək olur. Partiya ilin əvvəlində xeyriyyə məqsədləri üçün təxminən 15 min manatlıq büdcə ayrılıb. Bu büdcədən istisna hallarda digər ehtiyacı olan Azərbaycan vətəndaşlarına da ayrılır. Qurban bayramı günlərində də partiyanın imkansız üzvlərinə qurban payları göndəriləcək. Eləcə də siyahı üzrə partiyanın üzvü olmayan 17 nəfər ehtiyac içərisində olan insan mövcuddur. Onların içərisində ağsaqqal, ağbirçəklər, ailə başçısını itirənlər var. Həmin insanlara da qurban payı göndəriləcək".
Müsavat Partiyasının başqan yardımçısı Gülağa Aslanlı qeyd edib ki, Partiya Qurban bayramını müqəddəs dini bayramlardan biri hesab edir:
“Bu bayram insanların imkanlarını bir-biri ilə bölüşməsi üçün fürsətdir. Partiya imkanları daxilində ehtiyacı olan ailələrə qurban payı göndərməyi planlaşdırır”.
