“Kremlə həm Bakıdan, həm də İrəvandan şikayətlər gedir. Bakı İrəvanın kommunikasiya xətlərinin açılmasını uzatdığını bildirir, İrəvan isə əsirlərin geri qaytarılmadığını iddia edir”.

Modern.az xəbər verir ki, bunu politoloq Elxan Şahinoğlu Rusiya prezidenti Vladimir Putinin dünən Azərbaycan və Ermənistan liderləri İlham Əliyevlə Nikol Paşinyana zəng etməsini şərh edərkən bildirib.

Politoloqun sözlərinə görə, tərəflər arasında vasitəçilik edən Kremlə şikayətlər daxil olduğundan Rusiya prezidenti Vladimir Putin iki ölkənin lideriylə telefon danışığına ehtiyac duyub.

“Putin telefon danışığında atəşkəsə riayət edilməsindən razı qaldığını bildirərək, 9 noyabr və 11 yanvar bəyanatlarının yerinə yetirilməsinin durumunu tərəfdaşlarıyla müzakirə edib.

Bu telefon zənginin iki mənası var. Birincisi, Putin demək istəyir ki, proses onun nəzarəti altındadır, ikincisi, tərəflər 9 noyabr və 11 yanvar bəyanatlarının yerinə yetirilməsini sürətləndirməlidirlər”.

E.Şahinoğlu deyir ki, bəyanatları yerinə yetirməyən varsa, o da Ermənistandır:

“Dağlıq Qarabağda hələ də əli silahlı separatçılar var, İrəvan kommunikasiya xətlərinin açılmasına maraq göstərmir və bunun nəticəsidir ki, 1 mart tarixinə qədər liderlərin masasına təkliflər paketi təqdim edilməyib”.

 
Politoloq onu da əlavə edib ki, Azərbaycanın müharibədən sonra təkbaşına və Türkiyə ilə birgə hərbi təlimlərinin sayını artırması doğru strategiyadır. Bu,  Ermənistanı məcbur edir ki, onun da ordusu məsələyə hansısa formada reksiya versin, hərbi təlimə maliyyə ayırsın, məhdud hərbi sursatlarını istifadə etsin və s.

A.Qorxmaz